Үйлчлүүлэгч нартаа эрүүл аюулгүй орчинд чанарын шаардлага хангасан үйлчилгээ үзүүлнэ
Bolor
2020-05-22
“Түмэн төмөрт” ХХК-ийн Ерөнхий захирал С.Түмэнбаяр
Компанийнхаа үйл ажиллагааны чиглэл болоод хүний нөөц, хүчин чадлынхаа талаар танилцуулна уу?
Манай компани 1999 онд “Дөрөөт” нэртэйгээр төмрийн худалдааны чиглэлээр үйл ажиллагаагаа эхэлж, 2007 онд төмөр хийцийн үйлдвэрлэлээр өргөжүүлэн компанийн нэрээ одоогийн “Түмэн Төмөрт” ХХК болгон өөрчилсөн. Ингээд үндсэн үйл ажиллагаа нь төмрийн худалдаа болон төмөр хийцийн үйлдвэрлэлийн чиглэлтэй болж Саппоро, Толгойт, Цайз гэсэн гурван цэгт үйл ажиллагаагаа явуулж байна. Салбартаа 20 жил тасралтгүй ажилласнаар байнгын үйлчлүүлэгч, харилцагчид, түншүүдтэй болж, жилээс жилд үйл ажиллагаа өргөжин цар хүрээгээ тэлж, бизнесийн тогтвортой хөгжлийг ханган, тасралтгүй сайжруулалт хийгдсэний үр дүнд одоогоор 100 орчим ажилтныг ажлын байраар хангаж, албан ёсны хүний нөөц, маркетинг, санхүү гэсэн албадтай болсон байна. Манай байгууллага 2019 оны 04-р сараас эхлэн “Даат консалтинг” компаниас байгууллагадаа хэрэгжүүлэх MNS ISO 9001:2016, MNS ISO 45001:2018, MNS ISO 14001:2016 стандартуудын зөвлөх үйлчилгээг авч, улмаар 2019 оны 12-р сард “SFCS” ХХК-р баталгаажуулалт хийлгэсэн. Энэ нь манай компаниар үйлчлүүлж буй үйлчлүүлэгчдэд эрүүл аюулгүй орчинд чанарын шаардлага хангасан үйлчилгээ үзүүлнэ гэсэн нэг төрлийн баталгаа болж байгаа юм.
Олон машин механизм, тоног төхөөрөмжтэй байх, тэдгээрийн ашиглалтын үеийн аюулгүй ажиллагааг хэрхэн хангаж байна, магадлалд орсон уу?
Манайх компанидаа 30 гаруй төрлийн машин механизм, тоног төхөөрөмж ашигладаг. Тиймээс тэдгээр тоног төхөөрөмжийн хэвийн ажиллагаанд анхаарч техник тус бүрд нь паспорт хөтлүүлж, графикийн дагуу урсгал засвар үйлчилгээг тогтмол хийлгэдэг. Ингэснээр үйлдвэрийн ажлын бүтээмж хэвийн явагдаж ажилтан бүр аюулгүй ажлын байранд ажиллах нөхцөл бүрддэг. Бид техник тоног төхөөрөмжийн хэвийн ажиллагаа, цаашлаад ажилтны аюулгүй ажиллах нөхцөлийг бүрдүүлэх үүднээс тоног төхөөрөмжийн магадлалыг мэргэжлийн байгууллагаар хийлгэдэг. Тухайлбал 5 тонн, 10 тонны гүүрэн крануудын магадлагааг жилд нэг удаа “Мөрөн Тэнгэр” ХХК-р хийлгэж байна.
Ямар улсын тоног төхөөрөмж хэрэглэж байна. Шинэ техник, технологи хэрэглэж байна уу?
Бид ОХУ, Хятад, Энэтхэг улсын төмөр бэлдэц хуйлах, нугалах, хайчлах, матах, токарийн машин, пресслэгч, СNС автомат плазма зэрэг тоног төхөөрөмжтэйгээр үйл ажиллагаа явуулдаг. 2019 оноос орчин үеийн дэвшилтэт технологи болох төмөр хийцийн бүтээгдэхүүнээ хуурай аргаар будах технологийг боловсруулж үйлдвэртээ нэвтрүүлсэн. Энэхүү будгийн цехийн тоног төхөөрөмжийг бид адил төстэй технологиудыг судалсны үндсэн дээр дотооддоо өөрсдийн цехэд хийсэн. Энэ технологи нь төмөр хийцийн бүтээгдэхүүний будгийн өнгө гандахыг удаашруулах, бат бэх байлгах зэрэг олон талаар энгийн будгийн технологиос давуу талтай.
Харилцагч компаниуд, хэрэглэгчдийн сэтгэгдэл ямар байдаг вэ? Судалгаа хийдэг үү?
Маркетингийн ажлын хүрээнд хийгддэг хамгийн чухал ажлуудын нэг бол хэрэглэгчдийн сэтгэл ханамжийн судалгааг тогтмол хийх байдаг. Үйлчлүүлэгчид, харилцагчдын зүгээс ихэвчлэн олон жил тогтвортой хамтарч ажиллах хүсэлтэй байдаг. Эдгээр үйлчлүүлэгчид манай компаний үйлчилгээг түргэн шуурхай, найрсаг харилцаатай гэж дүгнэдэг ба бараа бүтээгдэхүүн нь сонголт ихтэйгээс гадна гүйцэтгэл нь чанартай гэж үздэг. Иймд манайхыг сонгон олон жил тогтвортой хамтран ажиллаж байгаа үнэнч харилцагч нартаа талархаж явдаг. Улаанбаатар хотын зүүн болон төв, баруун гэсэн гурван байршилд үйл ажиллагаа явуулж байгаа нь үйлчлүүлэгч нартаа ойр байж, хүргэлтийг түргэн шуурхай хийх зорилготой юм. Үйлчлүүлэгчдийн судалгааг хувьчлаад үзвэл нийт хэрэглэгчид, хамтран ажиллагсдын дийлэнх нь манай байгууллагын бараа бүтээгдэхүүн, үйлчилгээний чанарын талаар эерэг гэсэн дүгнэлт өгсөн байдаг. Иймд бид урамшин удирдлагуудаас эхлээд шат шатандаа, ажилтан бүр хэрэглэгчид, хамтран ажиллагсддаа чанартай үйлчилгээ үзүүлж үйл ажиллагаагаа улам сайжруулахыг зорилго болгон ажиллаж байна.
ХАБЭА-н албатай юу. Сургалтын зохион байгуулалт, хамгаалах хэрэгслийн хангалт, түүний мөрдөлтөд яаж хяналт тавьдаг вэ?
Байгууллагын ажилтан нь хамгийн үнэт капитал гэдэг утгаар тэднийг хамгаалах, аюулгүй орчинд ажиллаж хөдөлмөрлөх бололцоог бид бүрдүүлэх үүднээс Монгол улсын ХАБЭА -н тухай хууль, түүнтэй холбогдолтой дүрэм журам, тогтоолд нийцсэн дүрэм журмыг боловсруулж, удирдах албан тушаалтны манлайлалтайгаар ажилтны идэвх санаачлага, оролцоог дэмжин ажилладаг. Байгууллагын ХАБЭА-н албатай, инженер техникийн ажилтан, ахлах ажилтан нар нягт холбоотой ажилладаг. Сургалтын хувьд мэргэжлийн байгууллагаар хийлгэхийн зэрэгцээ манай ХАБЭА-н алба сургалт зохион байгуулах ажлыг хариуцан ажиллаж, инженер техникийн болон ахлах ажилтан нарыг татан оролцуулдаг.
Эрсдэлийн үнэлгээ хийсэн үү, аюулгүй ажиллагааны талаар ажилчид хэр мэдлэгтэй байна? Эрсдэлтэй ажлын байрныхаа талаар?
Манайх төмөр хийцийн үйлдвэр учраас өдөр тутамд гүйцэтгэж байгаа ажил нь байнга эрсдэл дагуулдаг. Ажилтан бүр ХАБЭА-н сургалтад тогтмол сууснаар аюулыг таних, учирч болзошгүй эрсдэлийг үнэлэх мэдлэгтэй болдог. Энэ эрсдэлийг бууруулах талаар ХАБЭА-н алба арга хэмжээ авч ажиллан эрсдэлийн үнэлгээг хийж түүнийг ажилтан нарт тогтмол мэдээлдэг юм. Эрсдэлийг бууруулахын тулд эрсдэлийн үнэлгээг гурван үе шаттайгаар хийдэг. Үүнд ажилтан бүр ажил эхлэхийн өмнө өөртөө эрсдэлийн үнэлгээ хийх, ажлын байранд үзлэг шалгалт хийх, эрсдэл өндөр гэж үзвэл хоёрдугаар төвшинд инженер техникийн ажилтан, ахлах ажилтан нарын багаар эрсдэлийн үнэлгээг хийлгэх зэрэг дарааллаар явдаг. Хэрэв эрсдэлийг бууруулах арга хэмжээ авах боломж бага бол ХАБЭА-н алба гуравдугаар төвшний эрсдэлийн үнэлгээг хийдэг. Үүнтэй холбогдуулан бид ажилтан бүрт ажлын байр эрсдэлтэй гэсэн тохиолдолд ажлыг шууд зогсоох эрхийг олгодог.
Аюулгүй байдлыг мөрдсөнөөр ямар өөрчлөлтүүд гарч байна. Мөн мөрдөж ажиллаагүй тохиолдолд ямар арга хэмжээ авдаг вэ?
Бид ХЭМАБ-ын MNS ISO 45001:2018 олон улсын стандартыг нэвтрүүлж Монгол улсын ХАБЭА-н хуулийг мөрдлөг болгон ажилласнаар ажилтнуудын мэдлэг нэмэгдэж үйлдвэрлэлийн осол хамгийн бага түвшинд хүртэл буурсан. Хэрэв аюулгүй ажиллагааны зааварчилгааг мөрдөж ажиллаагүй тохиолдолд бид юуны өмнө үл буруутгах зарчмын дагуу шалтгааныг судалж аюулгүй ажилласнаар ажилтанд ямар ач холбогдолтой талаарх мэдээллийг өгдөг. Харин зориудаар мөрдөж ажиллаагүй тохиолдолд байгууллагын дотоод журмын дагуу арга хэмжээ авна. Мөн эрсдэлтэй ажлын байр гэж явдаг төмөр хийцийн үйлдвэрт аюул ослоос сэрэмжлүүлэх үүднээс хангалттай хэмжээний тэмдэг тэмдэглэгээг байршуулсан байдаг.
Удирдах албаны хүний хувьд компанийхаа ажилчдын аюулгүй байдлын төлөө ХАБЭА-н хууль дүрэмд нэмж оруулаасай гэсэн зүйл байдаг уу?
Мэдээж аливаа хууль тогтоомж цаг хугацааны турш улам боловсронгуй болж байх шаардлагатай. Бидний хувьд ХАБЭА-н хуулинд ХАБЭА-н сургалтын цагийг уртасгах, чанарыг сайжруулах талаар нэмэлт өөрчлөлт оруулах шаардлагатай байна гэж бодож байсан. Харин өнгөрсөн 2019 оны 12 сард Хөдөлмөр, нийгмийн хамгааллын яамны сайдын А/370 тоот тушаал гарч ХАБЭА-н сургалт явуулах болон шалгалт авах журам шинэчлэн батлагдсанд сэтгэл ханамжтай байгаа. Ингэснээр ажилчид ХАБЭА-н мэдээллийг урт хугацаанд илүү сайн ойлгож, илүү чадвартай болно гэж харж байна.
Цаашид байгууллагынхаа ХАБЭА-г илүү сайжруулах тал дээр юу хийх вэ?
Цаашид бид ХАБЭА-н MNS ISO 45001:2018 стандартын шаардлагын дагуу өөрсдийн үйл ажиллагааны хүрээнд тасралтгүй сайжруулалтыг хангаж ажиллахыг зорьж байна. ХАБЭА-н албаны боловсруулсан аюулгүй ажиллагааны зааварчилгааг ХАБЭА-н хуулийн дагуу тухайн ажлын байрыг хариуцан ажиллаж байгаа ахлах ажилтан болон инженер техникийн ажилтан нар өгөх үүргийг манайд хүлээдэг. Шаардлагатай тохиолдолд ХАБЭА-н алба аюулгүй ажиллагааны зааварчилгааг мөн өгөх үүрэгтэй байдаг.
Салбартаа анхлан олон улсын чанарын, хөдөлмөрийн аюулгүй байдал эрүүл ахуйн, байгаль орчны зэрэг гурван стандартыг хэрэгжүүлэн үйл ажиллагаандаа нэвтрүүлэн ажиллаж байгаагаа нийт харилцагчиддаа, хамтран ажиллагч мөн шинээр хамтын ажиллагаа эхлүүлэх гэж буй байгууллагууддаа дуулгахад таатай байна.
Энэ дашрамд та бүхэндээ талархаж буйгаа илэрхийлэн цаашдын хамтын ажиллагаандаа амжилт хүсье.